Absenden 2013

Samichlaus 2013

 Als Samichlaus hüt im Schore

es isch chalt, ich wär no fascht verfrore

Liebi Lüt vo nah und fern

dä warmi Empfang ghör ich dänn gern

Begrüesse wett ich Eu i grossem Stil

Hoi zäme, da isch de VC Adliswil

 

Bi dere Glägeheit: Begrüesse wett ich no

zwei Bekannti wo äxtra vo Horge sind cho

Die tüend die Räne immer guet organisiere

mir chönd da nume profitiere

Nomal vile Dank und kei Sorge

Es lebe der Velo-Club in Horge!

 

Eigentlich han ich hüt gar nöd wele cho

die Tragik vom Marcel beschäftiget mich immer no

im Früelig a de Usfahrte isch er deby

sogar amene Trainingslager in Malorca isch er g’sy

dänn fühlt er sich plötzlich nüme g’sund

Im Spital: en Tumor isch de Befund

Vo det a isch die ganzi Sach verdorbe

De Marcel isch am 25. August g’schtorbe

Mir stönd jetzt uf: ihm zu Ehre da

und dänket über euses Mitglied na

 

Jede vo eus dä weiss

de Urs Gretsch isch Bruchpilot Nr. 1

Nach em Beckebruch: das isch ja allerhand

jetzt mit em Töff: fascht s’Chnü abenand

De Dokter meint (weisch dä wonen operiert)

ali Chnoche seiged jetzt strichcodisiert

er mües dänn nüme so umewetze

s’nächschtmal chameren vill schnäller zämesetze

 

E Tascheapothek han ich Dir hüt bracht

nimm Dich aber gar in Acht

wänn Du a de Usfahrte bisch deby

sett die i dinere Tricottäsche si

Für dini Schürfige und Chräbeli

häts da ine Pfläschterli

Damit die Wunde schnäll tüend wiche

tuesch mit Salbi ächli drüberstriche

 

  

Lisch aber am Bode und bisch ganz stile                                                                            

rat ich Dir zu dere Pile

en Verband häts au deby

wicklisch Dich dänn demit y

und mit dym programmierte I-Phone

chömets vo de nächschte Chrankeschtation

 

De Samichlaus wird langsam alt

Ächli zitterig und vergässlich halt

Sind die Portugiese bi eus scho es Jahr

oder sind das öppe zwei sogar?

Ich weiss nur: guet händ sich die aklimatisiert

und sind bi eus au total integriert

Miró, Louis, José und Louis II

Velofahre chönd die, ei ei ei!

Wänn die a de Usfahrte sind deby

Bisch total kabutt, chasch sicher sy

Doch kameradschaftlich sind si überall

Es lebe die Freundschaft Schweiz – Portugal

 

Concordia z’Italie isch das Schiff

Wo hange blibe isch amene Riff

Bis die dänn ändlich sy bereit

zum Ufstele, vergaht en Ewigkeit

I Millionehöchi sind die Choschte

chönsch fascht es neus Schiff go poschte

Ich han das mit em Veloclub berate

wo vor e paar Jahr in Schieflag isch grate

Doch mer händ en Retter gha

eine bringt das Schiff uf Vordermaa

und g‘koschtet hät’s kei einzige Franke

Eusem Präsi tüend mir rächt härzlich danke

 

Us‘em Heftli han ich erfahre

dusche tuet er lieber als velofahre

Zum Schribe bisch Du taläntiert

mer märkt’s Richi: Du häsch schtudiert!

Din Bricht vom Dusche isch en Hit

drum bring ich Dir es Dusch-Dasch mit

 

D‘ Clubmeischterschaft isch fascht usgartet

7 Fahrer sind das Jahr gschtartet

Sovil wie vor zig-Jahre

Es Comback: am André Mathis sys Ziel

er gwünnt die Meischterschaft in grossem Stil

mer gratulieret Dir - de ganzi Verein

u klatsched dezue obendrein

 

D‘ Tour de Suisse isch scho lang verby                                                                               

und spannend isch si au no gsy

ei Etappe füert durch Adliswil

das lit nöd a de Limet, das lit a de Sihl

En Veloclub, das gits det au

Doch für Tour de Suisse interessiert sich da kei Sau

Blamabel isch das, fascht zum Lache

das müend mer s’nöchschtmal besser mache

Nur de Dani Brunner hät’s vollbracht

de hät für de VCA Furore gmacht

In Vollmontur tuet er en Wäg sich bahne

und schwänkt e grossi Schwizerfahne

au e Foti mit em Beat Breu als Alibi

schwätzt er doch mit dem es ganzes Wili

Liebe Dani, das häsch dänn ganz toll g’schmisse

Du häsch de ganzi Veloclub eleige usegrisse

 

De Migi isch es Phänomen

nur neumet dure hät er es Problem

Öppis hät de gueti Maa,

das er nöd zytig ufstah cha

Ich schtudiere naa, Schtunde über Schtunde

u plötzlich han ich’s usegfunde!

En Wecker -  jetzt chasch wider lache -

wo am Morge en huere Meis tuet mache

jetzt chömmer mit em Migi pünktlich schtarte

und müend nüme uf ihn warte

 

So, für hüt han ich jetzt g’schlosse

Ich hoffe, ihr heiget’s ächli gnosse

Ich sälber mues hüt früeh is Näscht

Ich wünsche E no e fröhlichs Fäscht!

 

                        ***

 

.. was – Zuegab g’hör ich da…

dänn fanget mer nomal vorne aa

I de leschte Clubnachrichte,  oh la la                                                                                

so gueti Biiträg hät’s no gar nie g’ha!

G’schpannt ufs neui Heftli – was eso gaht,

und - ob ächt öppis vo mir dine schtaht?

Ja, i de neuschte Clubnachrichte

mit Föteli tüend’s dänn vo mir brichte

Au das Ufsätzli: fantastisch g’schribe

aber gäll Dökti, da häsch ä chli übertribe!

G’würgt heb ich am Berg: Schtimmt nöd,

das hütig Material isch eifach schpröd…

und die im Zug, mit de churze Hösli vis-à-vis:

So hübsch isch die jetzt au nöd g’sy…

Aber was ihr brichtet, isch mir glych

d’ Hauptsach‘, ihr schribet öpis über mich!

 

weisch no .......... Rückblick

Aktuelles

Absenden 2013:
Fotos von Dani